Nakapanlulumong isipin na tila
mas maraming bumagsak sa nakaraang Alternative Learning System (ALS)
Accreditation & Equivalency (A&E) test na ibinigay ng Department of
Education (DepEd) noong ika-24 ng Pebrero, 2019 para sa Luzon at ika-3 ng Marso,
2019 para sa Visayas at Mindanao kahit hindi pa inilalabas ng DepEd ang opisyal
na bilang at poryento ng mga pasado. Maraming dahilan kung bakit hindi pumasa
sa pagsusulit ang mga mag-aaral ng ALS subali’t malaking bahagi nito ang dahil
sa kakulangan.
1. Kulang sa oras. Ito
ang malimit na dahilan kung bakit hindi pinalad ang isang ALS learners. Kulang
ang oras ng mga mag-aaral sa pagpasok sa mga araw na kailangang pumasok dahil
na rin sa pagtatrabaho at iba pang gawaing-bahay. Dahil kailangan munang kumita
at/o tapusin ang mga gawaing-bahay, limitado rin ang kanilang oras sa
pagrerepaso ng mga leksyon. Kulang din ang oras ng mga guro at coordinators ng
ALS upang pagtuunan ng pansin ang paparaming estudyante. Hindi sapat ang
kanilang oras upang masigurong nauunawaan ng mga mag-aaral ang bawat kasanayan
at karunungang dapat taglayin upang sila ay makapasa sa pagsusulit.
2. Kulang sa pokus at
konsentrasyon. Dahil maraming mga bagay ang dapat pagtuunan ng pansin ng
sabay-sabay, nagkukulang sa pokus at konsentrasyon ang mga mag-aaral ng ALS.
Kadalasan, mali pa ang pinagtutuunan nila ng pansin. Mas marami ang
nag-i-internet hindi upang maghanap ng mga review materials kundi upang
makipagsosyalan lamang sa Facebook at Twitter. Nawawaglit sa kanilang isipan na
dapat ang unahin ay kung paano pumasa sa ALS A&E kaysa kung paano
magkakaroon ng maraming kaibigan at/o nobyo/nobya. Nakasalalay sa pagpasa sa eksamin
ang katuparan ng kanilang mga pangarap kung kaya’t doon dapat sila naka-pokus.
3. Kulang sa tiwala. Marami ang hindi pumasa sa pagsusulit dahil
kulang sila sa tiwala sa sarili. Hindi pa man nagsisimula ang pagsusulit, sa
kanilang isipin, sila ay bagsak na. Hindi nila pinaghandaan o binigyang
solusyon ang kanilang kahinaan. Hindi nagtanong sa guro at mga kamag-aral kung
paano i-solve ang isang Math problem. Pinabayaan nilang lukobin sila ng takot
at ipagwalang-bahala ang kanilang mga pangarap. “Bahala na si Batman!”, ‘ika
nga nila.
4. Kulang sa load. Dahil sa kakulangan sa salapi, maraming mag-aaral
ang kulang sa load upang makahanap ng mga websites at social group na
makatutulong sa kanilang pag-aaral at pagrerepaso. Ito ang dahilan kung bakit hindi
nila nahahanap ang mga dapat nilang aralin at repasuhin. Gayunman, dapat ay
gumawa sila ng paraan upang kahit papaano ay maka-connect sila sa internet o
kung hindi man ay humingi ng tulong sa mga kamag-aral na gumagamit nito.
5. Kulang sa review materials. Isa ring kadahilanan ng pagbagsak ng
marami sa pagsusulit ay ang kakulangan ng mga review materials buhat sa kanilang
guro. Kung walang ideya ang mga guro kung anong karunungan at kasanayan ang
posibleng lumabas sa eksamin, mahihirapan pumasa ang mga mag-aaral dahil tila
nangangapa sila sa dilim sa dami ng dapat pag-aralan. Kung meron mang
reviewers, mali ang akala ng ibang estudyante na ang mga ito mismo ang lalabas
sa pagsusulit, words for words. Hindi nila batid na ang mga reviewers at giya
lamang. Konsepto ang dapat pag-aralan at hindi ang mismong sagot dahil iba ang
lalabas sa test kaysa sa nirepaso subali’t naroroon ang konsepto.
6. Kulang sa pansin. Dahil kulang sa pansin ng mga guro, magulang,
kamag-aral, at kaibigan, pa-bandying-bandying lamang ang ilan sa mga ALS
learners. Kulang ang mga nag-uudyok upang pagbutihin nila ang pag-aaral,
pagrerepaso, at pagkuha ng eksamin. Dahil kulang ang pumapansin sa kanila, hindi
sila nagpupunyagi nang husto dahil para sa mga mag-aaral na ito, pareho lamang
kung sila ay pumasa o bumagsak sa pagsusulit.
7. Kulang sa pagsagot. Isa ring dahilan ng pagbagsak ng mga mag-aaral
ng ALS ay ang katamaran nilang sumagot sa mga tanong na naka-post sa kanilang
grupo. Kalimitan, hanggang “SEEN” na lang sila. Hindi man lamang sinubukang
sagutin o i-solve ang isang Math problem. Kung hindi nila ito ginawa, paano
nila malalalaman na sapat na ang kanilang kaalaman, kasanayan, at kahandaan sa
pagsusulit? Mas mabuti nang magkamali sa pagsagot sa tanong bago pa ang
pagsusulit kaysa sa mismong eksamin.
Ikaw, pumasa ka ba sa 2018 ALS A&E test? Ano ang dahilan kung bakit
ka bumagsak? Ano ang kakulangan sa iyo? I-komento sa ibaba.
Ano man ang dahilan ang iyong pagbagsak sa A&E test, nararapat lamang na itama ang inyong pagkakamali dahil nakasalalay sa pagpasa rito ang iyong mga pangarap sa buhay. Bumangon at lumabang muli! Maging handa!
